معاناة عدني

حابب تعرف ايش الي حاصل ب اهل عدن ؟طيب حابب تحس ب الي يحسوه ؟أول م بتجي تنام تطفي الكهرباء وتظل تنتظر 3 ساعات عشان تلصي واول م تبدء تنام يقيمك صوت قنابل الهاون من عز النوم تقوم تتخبط وتتفاقد الي جنبك هم بخير ولا حد صار له شي ؟ تحصل الكل قام يجري من مكانه خايف ويرتجف ويحمد ربه انها م اجت فيه ولا بلمكان الي هم فيه، ويرجع يدعي ويبكي ع الناس الي اجت فيهم ، وتقول بترجع تنام تطفي الكهرباء من جديد وترجع للحر والكضمه م في اكسجين والهواء واقف تحس انفاسك تطلع بصعوبه ، وتقول بتروح تتغسل تلاقي الماء مقطوع يجيلك كبده بقلبك يعني لا كهرباء ولا ماء . طيب اتخيل انك تسمع فلان مات صديقك فيه حمى الضنك . وصديقك الفلاني بغيبوبه وحالته صعبة وابو صديقك قتلوه تظل تبكي وتقهر تشتي تطمن تشتي تعزي مافي بس برضة م في تغطيه م في شبكة نت مافي شي تبكي لك قليل وتصلي ركعتين تدعي لهم فيها .. 
اتخيل انك بلحظة عين فقدت اهلك اصدقائك جيرانك شغلك مدرستك كليتك مستقبلك امس الي راح وبكره الي بيجي كلهم يعدو بدون فايده .. جرب اشتاق ل حارتك ل اسواق كريتر والمنصورة للخرجه ب امان لزياره اهلك واصحابك ل تأذية واجب سواء مرض أو عزاء أو ولاد أو سفر . جرب تشتاق لناس كانو دايما حولك وفجأه كل واحد راح ببلاد وبمنطقه . أتخيل تكون مقهور يجي حد يقولك بكره رمضان تنصدم رمضان ي اخي كيف رمضان ونحنا بحرب ليش كده بدري نشتي نصوم بدون خوف بدون حر ..براحه .. بعدين يدخل عليك رمضان وانت بحالة غير كل سنه م في فرحه ولا استعداد الي معك بتسويه والي مش موجود انعدم بتستغنى عنه ،ناس تلقى تاكل وناس م تلقى وربي عالم بحالها .. جرب تصوم والكهرباء طافيه الرجال تخرج وتجيب سبار البيت بالشمس والحمى تروح تلاقيها طافيه والحريم والبنات يدخلو المطبخ يتمهرو ويختلسو خلسه م بعدها خلسه بس صابرين عشان يقربو ل اولادهم لقمه حلوه ع الاقل يعوضوهم ويحسسوهم انه رمضان .. 
رغم انه كل واحد جالس بمكانه ينتظر دوره ،ورغم الألم والخوف والجوع والعطش بس مكانحنا متفائلين ووالعشر الدقايق او الساعه الي ميقرحوش فيبه فيوز ويضربو هاون نحنا نستغله ونضحك ع الي . زو والي نزل تحت السرير والي صرخت تلاقي صياح مليان ديمه . ونرجع نتأمل انه بكره احلى وبنعيد هناك وبترجع عدن زيما كانت وبنصلحها ان شاء الله .
لو م عشت كل هذأ لو م قدرت فعلا تتحمله يعني انت ممش حاسس بجد الي هم عاشوه وماراح تقدر تتحمله .
بس خلونا ندعي كلنا بدون يأس ونتمنى كلنا امنيه وحده وهي سلامة عدن وناسها .. 
~~معاناة عدني 💔